Insight into Anicca, Dukkha, Anatta - The Threefold Nature of Reality by
Rev. Nawalapitiye Ariyawansha Thero
අනිච්ච, දුක්ඛ, අනත්ත
(ත්‍රිලක්ෂණය) අවබෝධ කරගනිමු
අනිත්‍ය බව, දුක් බව, අනාත්ම බව භාග්‍යවතුන් වහන්සේ වදාළ බුද්ධ වචනය අනුවම පිළිගෙන, දරාගෙන, පුරුදු කරගැනීම පිණිස මඟ විවර කර දෙන ධර්ම දේශනා මාලාව...
– පූජ්‍ය නාවලපිටියේ අරියවංශ ස්වාමීන් වහන්සේ
මෙම පිටුව පරිහරණය කිරීම පිණිස මඟපෙන්වීමක් ...
1. ධර්ම දේශනාවේ නම තිබෙන කොටුව ඇතුලත Click/Touch කරන්න.
2. දැන් ඔබට පෙනෙන සුදු ඊතලයක් සහිත රතු පැහැති රවුම මත Click/Touch කිරීමෙන් දේශනාව ශ්‍රවණය කළ හැක.
3. DOWNLOAD MP3 යන වචනය මත Click/Touch කිරීමෙන් දේශනාව download කිරීමට යොමුවෙන්න පුළුවන්.
භාග්‍යවතුන් වහන්සේ රූප, ශබ්ද, ගන්ධ, රස, පහස, අරමුණු වල අනිත්‍ය බව, දුක් බව, අනාත්ම බව මනා නුවණින් දැකිය යුතු ස්වභාවය පිළිබඳවත්, එසේ මනා නුවණින් දකින ශ්‍රැතවත් ආර්ය ශ්‍රාවකයා ලබන මහත් වූ ප්‍රතිලාභ ගැනත් භික්ෂූන් වහන්සේලාට කියාදෙන මේ බාහිරානිච්ච සූත්‍රය ඔබත් ශ්‍රවණය කරන්න…!
“මහණෙනි, අතීත වූත්, අනාගත වූත් ඇස අනිත්‍යය යි. වර්තමානයේ ඇස ගැන කවර කතා ද? මහණෙනි මේ විදියට දකින ශ්‍රැතවත් ආර්ය ශ්‍රාවකයා අතීතයේ වූ ඇස ගැන අපේක්ෂා රහිත වෙනවා. අනාගතයේ ඇස ගැන සතුටින් අගය කිරීමක් නෑ…”
මේ විදියට වර්තමානයේ ඇස කෙරෙහි පිළිපදින විදිය ගැනත් භාග්‍යවතුන් වහන්සේ මනාකොට කියාදෙන මේ දුතිය අජ්ඣත්තානිච්ච සූත්‍රය ඔබත් ශ්‍රවණය කරන්න…!
“මහණෙනි, අතීත වූත්, අනාගත වූත් රූප අනිත්‍යය යි. වර්තමානයේ රූප ගැන කවර කතා ද?”
භාග්‍යවතුන් වහන්සේ මේ විදියට රූප, ශබ්ද, ගන්ධ, රස, පහස, අරමුණු වල අනිත්‍යය ස්වභාවය දකින ශ්‍රැතවත් ආර්ය ශ්‍රාවකයාගේ ස්වභාවය ගැනත්, කාමගුණ සූත්‍රයේදී භාග්‍යවතුන් වහන්සේ සම්බුද්ධත්වයට පෙර කාමගුණ කෙරෙහි සිත ඇදී ගිය ස්වභාවය ගැනත් කියාදෙන මේ ධර්මානුශාසනාව ඔබත් ශ්‍රවණය කරන්න…!
“මහණෙනි, භික්ෂුව අනිත්‍යය වූ ඇස අනිත්‍යය විදියට ම දකී ද, එය ඔහුට සම්මා දිට්ඨිය බවට පත්වෙනවා. ඒ සම්මා දිට්ඨියෙන් යුතුව දකින කෙනා තුල නිබ්බිදාව ඇතිවෙනවා. ඔහු තුල නන්දිය ක්ෂය වීමෙන් රාගය ක්ෂය වෙනවා. රාගය ක්ෂය වීමෙන් නන්දිය ක්ෂය වෙනවා. නන්දිරාගය ක්ෂය වීමෙන් ඉතා හොඳින් විමුක්තියට පත්වෙනවා.”
මේ විදියට ඇස, කන, නාසය, දිව, ශරීරය, සිතෙහි අනිත්‍ය ස්වභාවය දකින ශ්‍රාවකයා ඉතා හොඳින් විමුක්තියට පත්වීම දක්වා යන උතුම් ගමන ගැන කියාදෙන මේ ධර්මානුශාසනාව ඔබත් ශ්‍රවණය කරන්න…!
“චක්ඛුං භික්ඛවේ යෝනිසෝ මනසිකරෝථ. චක්ඛු අනිච්චතඤ්ච යථාභූතං සමනුපස්සථ”
“මහණෙනි, ඇස නුවණින් මෙනෙහි කරන්න! ඇසෙහි අනිත්‍ය බව ඇත්ත ඇති සැටියෙන් ම නුවණින් දකින්න!”
කළ යුත්ත කළ යුතුම යි කියලා එක එල්ලේ ම පණවන, අපව උනන්දු කරවන, වීරිය පටන්ගන්ට කැමැත්තෙන් ඉන්න ශ්‍රාවකයාට ජවය ඇති කරවන මේ භාග්‍යවතුන් වහන්සේගේ ඍජු වචන ඔබත් ශ්‍රවණය කරන්න…!
භාග්‍යවතුන් වහන්සේ දේශනා කරනවා,
“මහණෙනි, සියල්ල අනිත්‍යයි. කවර සියල්ලක් ද අනිත්‍යය? මහණෙනි, ඇස අනිත්‍යයි. ඇසට පෙනෙන රූප අනිත්‍යයි. ඇසේ විඤ්ඤාණය අනිත්‍යයි. ඇසේ ස්පර්ශය අනිත්‍යයි. ඇසේ ස්පර්ශය නිසා යම් ආකාරයක සැප විඳීමක් හෝ දුක් විඳීමක් හෝ දුක් සැප රහිත විඳීමක් උපදී ද එයත් අනිත්‍යයි….”
ඇලීම් ගැටීම් නැමති විස බැහැර කොට, සිත සුවපත් කර විමුක්තියට පමුණුවන දහම් ඔසුවක් බඳු මේ ධර්මය ඔබත් ශ්‍රවණය කරන්න…!
“ස්වාමීනි භාග්‍යවතුන් වහන්ස, ‘ලෝකය ශුන්‍ය යි, ලෝකය ශුන්‍ය යි’ කියනවා. කොපමණකින් ලෝකය ශුන්‍ය යැයි කියනවා ද?”
“ආනන්ද, යම් ආකාරයකින් ආත්මයකින් ශුන්‍ය වේ ද, ආත්මයකට අයිති දේකින් ශුන්‍ය වේ ද, එපමණකින් ලෝකය ශුන්‍ය වේ යැයි කියනු ලබනවා”.
ලෝකයේ අනිත්‍ය බව, දුක් බව, අනාත්ම බව දකිමින්, සිත මනාකොට නිදහස් වීම දක්වා සුන්දර වූ ධර්මයන් වඩමින් යන ගමන ගැන ඉගෙනගන්න මේ ධර්මානුශාසනාව ඔබත් ශ්‍රවණය කරන්න…!
“සමාධිං භික්ඛවේ භාවේථ, සමාහිතෝ භික්ඛවේ භික්ඛු යථාභූතං පජානාති.”
“මහණෙනි, සමාධිය භාවිත කරවු. මහණෙනි, සමාධිය සහිත භික්ෂුව ඇත්ත ඇති සැටියෙන් දැනගනියි.”
ඇස, ඇසට පෙනෙන රූප, ඇසේ විඤ්ඤාණය, ඇසේ ස්පර්ශය, ආදියෙහි ඇත්ත ඇති සැටියෙන් දකින ප්‍රඥාව උපදවාගන්ට කැමති ශ්‍රාවකයා සමාධිය පිණිස භාග්‍යවතුන් වහන්සේ පෙන්වූ මඟ වඩමින්, ශ්‍රේෂ්ඨ වූ ප්‍රඥාව උපදවා විමුක්තිය සාක්ෂාත් කිරීම ගැන ඔබත් ඉගෙනගන්න සළායතන සංයුත්තයේ සමාධි සූත්‍ර දෙකක් ඇසුරින් සිදුකළ දහම් අනුශාසනාව ශ්‍රවණය කරන්න…!
“…උපවාණ, යම් විදියකින් භික්ෂුව ඇහෙන් රූප දැකලා, රූපයත් දැනගෙන, රූප රාගයත් දැනගෙන, තමා අභ්‍යන්තරයේ තියෙන මේ රූප රාගය ගැන ‘මා අභ්‍යන්තරයේ මේ රූප රාගය තියෙනවා’ කියලත් දැනගනියි ද, උපවාණ, අන්න එපමණකින් ම ධර්මය සන්දිට්ඨිකයි, අකාලිකයි, ඒහිපස්සිකයි, ඕපනයිකයි, පච්චත්තං වේදිතබ්බෝ විඤ්ඤූහී බවට පත්වෙනවා…”
ධර්මය සන්දිට්ඨික වන්නේ කොපමණකින් ද යැයි විමසූ ප්‍රශ්නයට පිළිතුරු වශයෙන් භාග්‍යවතුන් වහන්සේ දේශනා කළ මේ උතුම් ධර්මයන් ඉස්මතු කොට, එය තමන්ගේ ජීවිතයට ගලපාගැනීම පිණිස උපකාර සලසන මේ ධර්මානුශාසනාව ඔබත් ශ්‍රවණය කරන්න…!
“මහණෙනි, ඇස අනිත්‍යයි. විපරිණාමයට පත්වෙනවා. වෙනස් දෙයක් බවට පත්වෙනවා. කණ… නාසය… දිව… ශරීරය… සිත…. මහණෙනි, යමෙක් මේ ධර්මය මේ ආකාරයට ශ්‍රද්ධාවෙන් අදහාගැනීමෙන් මේ ධර්මයෙහි බැසගත්තොත් අන්න එයාට කියනවා ‘සද්ධානුසාරී’ කියලා, ඉතා යහපත් මාර්ගයට බැසගත්තා කියලා, සත්පුරුෂ භූමියෙහි බැසගත්තා කියලා, පෘථග්ජන භූමිය ඉක්මවා ගියා කියලා. යම් කර්මයක් කරලා නිරයේ, තිරිසන් ලෝකයේ ප්‍රේත ලෝකයේ උපදිනවා නම් එබඳු කර්මයක් කිරීම අභව්‍යයි. යම්තාක් සෝතාපන්න ඵලයට පත් නොවී තිබෙන තාක් ඔහු කළුරිය කිරීමක් වෙන්නේ නෑ…”
මෙබඳු ශ්‍රේෂඨ ධර්මයන් විස්තර කෙරෙන, පුන් පොහෝ දින චක්ඛු සූත්‍රය ඇසුරින් සිදුකළ මේ ධර්මානුශාසනාව ඔබත් ශ්‍රවණය කරන්න…!
අසුභ සඤ්ඤාව, මරණ සඤ්ඤාව, ආහාරයේ පටික්කූල සඤ්ඤාව, සබ්බලෝකේ අනභිරත සඤ්ඤාව, අනිච්ච සඤ්ඤාව, අනිච්චේ දුක්ඛ සඤ්ඤාව, දුක්ඛේ අනත්ත සඤ්ඤාව කියන සඤ්ඤාවන් භාවිත කිරීම, බහුල වශයෙන් භාවිත කිරීම, මහත්ඵල වෙනවා, මහානිසංස වෙනවා, නිවනෙහි පිහිටනවා, නිවන දක්වා ම පවතිනවා කියලා භාග්‍යවතුන් වහන්සේ දේශනා කරනවා.
මේ එක් එක් භාවනාවෙන් ලැබෙන ඵල ගැන කියාදෙන, භාවනාවේ ප්‍රතිඵල ගැන නිශ්චිතාර්ථය දැනගැනීමෙන් බණ භාවනා කිරීමට වීරිය උපදවන, ඒ ගැන නුවණින් දැනගත යුතු විදිය ගැන කියාදෙන මේ විත්ථතසත්තසඤ්ඤා සූත්‍රය මුල සිට අවසානය දක්වා ඔබත් ශ්‍රවණය කරන්න…!
