දහම් වැඩසටහන - රත්නපුර

අද වන විට අපට ඇසෙන නොයෙකුත් දේශනා අතරින්… ඇසිය යුත්තේ කුමක්ද? පිළිපැදිය යුත්තේ කුමන මගද? හරි පාර කොයිකද? කියා නොදැන බොහෝ දෙනා සැකයෙන් සහ අධෛර්යයෙන් පසුවෙනවා. මේ සැකයන් දුරු කරගෙන සැබෑ ධර්මය, විනය, ශාස්තෘ ශාසනය නොවන දේ තමන්ටම වෙන්කර හඳුනාගැනීමට බුදුරජාණන් වහන්සේම දේශනා කළ මිනුම් දණ්ඩක් බඳු වන “සත්ථුසාසන සූත්‍රය” ඉගෙන ගෙන, කාලය අපතේ නොයවා නිවැරදිව පියවර තැබීමට ඔබට මෙය ආරම්භයක් වේවා!

නිබ්බිදා සූත්‍රයේදී කියාදෙන භාවනා පහ, ධර්මයට–විනයට–ශාස්තෘ ශාසනයට (සත්ථුසාසන සූත්‍රයට අනුව) අයිති බව දැනගෙන, ඒවා භාවිත කොට, බහුල වශයෙන් පුරුදු කිරීමෙන් ඒකාන්තයෙන් නිබ්බිදාව පිණිසත් (“කළකිරීම” කියන සාමාන්‍ය අර්ථයට එහා ගිය සැබෑ අර්ථය දැනගෙන), එයම හේතු වී පිළිවෙලින් විරාගය, නිරෝධය, උපසමය, අභිඥාව, සම්බෝධිය, නිර්වාණය සාක්ෂාත් කරගැනීම පිණිස දක්වාම වන මඟ ඔබත් දැනගන්න, පිළිගන්න, පුරුදු කරන්න…!

ඇස, කන ආදී ඉන්ද්‍රියයන් පිනවන රූප ශබ්දාදියෙහි ඇති ආශ්වාදය පමණක් දකිමින් මුලාවට පත් නොවී, එහි සැඟවුණු භයානක ආදීනවය සහ ඉන් නිදහස් වීම නම් වූ නිස්සරණය තේරුම් ගනිමින්–සිහි කරමින්, ‘නිබ්බිදාව’ යනු හාත්පස යථාර්ථය අවබෝධ කරගැනීමෙන් උපදින ප්‍රීතිමත් ස්වභාවයක් බව වටහාගෙන, ඒ තුළින් විරාගය, නිරෝධය, නිවන දක්වා යන ගමන ගැන කියාදෙන මේ ධර්මානුශාසනාව ඔබත් ශ්‍රවණය කරන්න…!

නිවස තුළදීම, දිනපතාම ස්වල්ප වේලාවකින් හෝ භාවනා කරන්ට පටන්ගෙන, හොඳ ඉරියව්වකින්, සරල උපක්‍රම භාවිතයෙන්, කාර්යබහුල ජීවිතය තුළම බණ භාවනා කරමින් විමුක්තිය සඳහා වන ගමනට උත්සාහ කරමු..!

අසුභයත්, ආහාරයේ පිළිකුල් සඤ්ඤාවත් වඩද්දී නොයෙක් දේ හිතමින් පිළිකුලක් උපදවාගන්නවා වෙනුවට, මාත්‍රාව දැනගෙන බෙහෙත් ගන්නවා වගේ, බුදුරජාණන් වහන්සේගේ වචනය පරිදිම හොඳින් ධර්මය පුරුදු කරමු. රස තෘෂ්ණාව දුරු කරමු.