Dhamma sermons on POYA days by
Rev. Nawalapitiye Ariyawansha Thero
පොහෝ දින ධර්ම දේශනා
පුන් පොහෝ දින වලදී නොයෙකුත් දහම් මාතෘකා ඔස්සේ සිදු කරනු ලැබූ ධර්ම දේශනා එකතුවක් මෙම වෙබ් පිටුවෙන් ශ්‍රවණය කළ හැකියි. මෙම ධර්ම දේශනා ශ්‍රවණය කරමින් සීල, සමාධි, ප්‍රඥා මඟ වඩමින් නිවන් මඟ සම්පූර්ණ ගැනීමට මඟ විවර වේවා!
– පූජ්‍ය නාවලපිටියේ අරියවංශ ස්වාමීන් වහන්සේ
මෙම පිටුව පරිහරණය කිරීම පිණිස මඟපෙන්වීමක් ...
1. ධර්ම දේශනාවේ නම තිබෙන කොටුව ඇතුලත Click/Touch කරන්න.
2. දැන් ඔබට පෙනෙන සුදු ඊතලයක් සහිත රතු පැහැති රවුම මත Click/Touch කිරීමෙන් දේශනාව ශ්‍රවණය කළ හැක.
3. DOWNLOAD MP3 යන වචනය මත Click/Touch කිරීමෙන් දේශනාව download කිරීමට යොමුවෙන්න පුළුවන්.
“…අපි කල්පනා කරන්ට ඕන, අධිෂ්ඨානයක් ඇති කරගන්ට ඕන ‘අපි බුදුරජාණන් වහන්සේගේ ගුණගරුක ශ්‍රාවකයෝ වෙලා, උන්වහන්සේට කෘතගුණ පිණිස අපේ ශ්‍රාවකත්වය සම්පූර්ණ කරගන්ට ඕන. අපි සෝතාපන්න, සකදාගාමී, අනාගාමී, අරහත් කියන මේ මාර්ගඵල ලබමින් බුදුරජාණන් වහන්සේට සැබවින්ම පූජා පවත්වන්ට ඕන. මේ ජීවිතය ගෙවෙන්ට මත්තෙන් බුදුරජාණන් වහන්සේ සතුටු වෙන විදියේ, සාධුකාර පවත්වන විදියේ ශ්‍රාවකත්වයක් මම ඇති කරගන්ට ඕන. මම අරහත්වයට, විමුක්තියට පත්වෙන්ට ඕන’ කියලා”.
අද උතුම් බක් පොහෝ දින දී, අෂ්ටාංග උපෝසථ සීලය සමාදන් වීමේ අර්ථයත්, සීලය—ශ්‍රාවකයාගේ විමුක්තිය පිණිස වන මඟට පදනම වන අයුරුත් පහදා දෙමින්, ශ්‍රද්ධාව බලවත් (සද්ධානුසාරී) ශ්‍රාවකයාට පවා කෙළෙස් ඉපදුනත් සතර අපායෙහි වැටෙන කර්ම වලින් වළකින අයුරුත්, එමගින් විශාරද බව, සැනසීම ලබමින් සීලය සම්පූර්ණ කරගැනීම ගැන කියාදෙන මේ ධර්මානුශාසනාව ඔබත් ශ්‍රවණය කරන්න…!
සතෙකුට ආහාරයක් දීමේ පටන්, නිවසේ අයට, දෙමාපියන්ට, මහා සංඝරත්නය උදෙසා, දානමය පුණ්‍ය ක්‍රියා කිරීමේදී සත්පුරුෂ දානයක් විදියට පිරිසිදුව, කැප අයුරින්, විමසා බලා, නිති යහපත් අයුරින් සොම්නස් සිතින්, ප්‍රසාදජනක සිතින් මනා වතපිළිවෙතින් යුතුව කිරීමෙන් රාග ද්වේශ මෝහ ආදියට ඉඩ නොදී සිත පිරිසිදු කරගැනීම පිණිස, සිහිය උපදවා ගැනීම පිණිස දානාදී පුණ්‍ය ක්‍රියා ප්‍රගුණ කරගැනීමට මඟ කියන මේ ධර්මානුශාසනාව ඔබත් ශ්‍රවණය කරන්න…!
“මහණෙනි, ප්‍රාණඝාතය ඇසුරු කරනවා නම්, භාවිත කරනවා නම්, බහුල වශයෙන් පුරුදු කරනවා නම්, එය නිරයෙහි ඉපදීම පිණිස පවතිනවා. තිරිසන් යෝනියේ, ප්‍රේත ලෝකයේ ඉපදීම පිණිස පවතිනවා. ප්‍රාණඝාතයෙහි යෙදෙන සියලු දෙනාටම පාහේ සුළු වශයෙන් / කෙටි කාලයක් තුල ඇතිවෙන විපාකයක් තමයි; මනුස්ස ලෝකයේ ඉපදුනු කල්හී ආයුෂය අඩු වෙනවා.”
මෙලෙස, සොරකම, වැරදි කාමසේවනය, බොරු කීම, කේලාම් කීම, ඵරුස වචන කීම, හිස් වචන කීම, මත්ද්‍රව්‍ය භාවිතය කියන දුශ්චරිතයෙහි විපාක පිළිබඳව භාග්‍යවතුන් වහන්සේ කියාදුන් ධර්මය ඔබත් ශ්‍රවණය කරන්න! ඒ ධර්මය දරාගෙන වාසය කරන්න!
ලැබුනු මිනිසත් බවෙහි වාසනාව ධර්මය තුලින්ම හොඳින් තේරුම්ගෙන, බුදුරජාණන් වහන්සේගේ අරහං, සම්මා සම්බුද්ධාදී ගුණ පිළිගනිමින්, ශ්‍රද්ධාව, සීලය, ශ්‍රැතය ආදී ධර්මයන් වැඩීමෙන්, මේ ලැබුණු වාසනාවන්ත සුගති ජීවිතයට නිග්‍රහ නොවී වාසය කිරීම පිණිස මඟ පෙන්වන මේ ධර්මානුශාසනාව ඔබත් ශ්‍රවණය කරන්න…!
“මහණෙනි, ධර්මය පුරුදු කරන සේඛ ශ්‍රාවකයාගේ විශාරදභාවය ඇති කරන්නා වූ ධර්මයන් පහක් තියෙනවා. මොනවාද ඒ පහ? මහණෙනි, මෙහි භික්ෂුව ශ්‍රද්ධාවෙන් යුක්ත වෙනවා. සීලයෙන්.., බහුශ්‍රැතභාවයෙන්.., ඇරඹූ වීරියෙන්.., ප්‍රඥාවෙන් යුක්ත වෙනවා.
මහණෙනි, අශ්‍රද්ධාවන්ත කෙනා කෙළෙස් වල ඇලී වාසය කරනවා. ශ්‍රද්ධාසම්පන්න කෙනා කෙළෙස් වල ඇලී ඉන්න ස්වභාවය නැතිව වාසය කරනවා…”
“මහණෙනි, දුක්ඛාර්ය සත්‍යය කියන්නේ කවරක් ද? ආධ්‍යාත්මික ආයතන හයට යි දුක්ඛාර්ය සත්‍යය කිව යුත්තේ. ඒ හය කවරක් ද? ඇස කියන ආයතනය, කන…, නාසය…, දිව…, කය…, සිත කියන ආයතනය යි.”
සම්මා සම්බුදුරජාණන් වහන්සේ හාත්පස, මනාකොට, පරිපූර්ණව කියාදෙන චතුරාර්ය සත්‍යය තම තමන්ගේ ජීවිතය තුල දකින්ට මහත් උපකාර සලසන, දුරුතු පුන් පොහෝ දින සිදුකළ මේ ධර්මානුශාසනාව ඔබත් ශ්‍රවණය කරන්න…!
බිඳ නොවැටෙන බලවත් සිතක් පිණිස උපදවා වැඩිය යුතු බලයන් 7ක් ගැන භාග්‍යවතුන් වහන්සේ විස්තර වශයෙන් කියාදුන් මේ ධර්මය ඔබත් ඉගෙනගෙන පුරුදු කරගන්න…!
කළ්‍යාණ මිත්‍ර ඇසුරින්, භාග්‍යවතුන් වහන්සේ දේශනා කළ පිරිසිදු චතුරාර්ය සත්‍යය ප්‍රකාශිත ධර්මය ශ්‍රවණය කිරීමෙන්, ධර්මය මතුපිටින් පමණක් නොබලා එහි සැබෑ අර්ථ ඉස්මතු කරගෙන, යෝනිසෝ මනසිකාරය ඇති කරගෙන, කර්කශ දුක් සදන රාග, ද්වේෂ, මෝහ දුරු වූ සුවපත් ජීවිතයක් ඇති කරගැනීම පිණිස උපකාර සලසන මේ ධර්මානුශාසනාව ඔබත් ශ්‍රවණය කරන්න…!
ඇස, ඇසට පෙනෙන රූප, ඇසේ විඤ්ඤාණය, ඇසේ ස්පර්ශය, ඇසේ ස්පර්ශයෙන් හටගන්නා සැප, දුක්, දුක්-සැප රහිත විඳීම්, කන,… මේ ආදී ධර්මයන් අනිත්‍ය වශයෙන් දකිමින්, නිවනට හිතවත් වන ප්‍රතිපදාව ගැන භාග්‍යවතුන් වහන්සේ කියාදුන් ධර්මයන් දරාගනිමින්, සිහි කරමින්, රාග ද්වේශ මෝහ දුරුකොට සිත පිරිසිදු කරගැනීමෙන්, දෙලොවෙහි ම සුවපහසු ජීවිතයක් ගත කිරීමට මඟ පෙන්වන අද පුන් පොහෝ දින සිදුකළ මේ ධර්ම දේශනාව ඔබත් ශ්‍රවණය කරන්න…!
තමන්ටත් අනුන්ටත් පීඩා ඇතිකරන, හැම දුකකට ම මුල්වන රාගය, ද්වේශය හා මෝහය යන අකුසල් සම්පූර්ණයෙන් නිරුද්ධ කිරීමේ ධර්මයේ පූර්ණ අර්ථය පිණිස බුදුරජාණන් වහන්සේගේ ශ්‍රාවකයා කටයුතු කළ යුතුයි. ඒ අකුසලයන් නිසා එදිනෙදා ජීවිතයේ දුක් හටගන්න විදියත්, ඒවා දුරු කිරීම පිණිස අසුභය, මෛත්‍රිය, ප්‍රඥාව වැඩීම ගැනත් කියාදෙන මේ ධර්මානුශාසනාව ඔබත් ශ්‍රවණය කරන්න…!
සං.නි. 4 – නවපුරාණ වග්ගයේ කම්ම සූත්‍රය ඇසුරින් පැරණි කර්ම හා අලුත් කර්ම ගැනත්, කර්ම නිරෝධය සහ කර්ම නිරෝධගාමිනී පටිපදාව ගැනත් කියාදෙන, ඒ ධර්මය කෙරෙහි ඍජු සිතින් සුචරිතයෙහි පිහිටීම පිණිස මඟ කියාදෙන මේ ධර්මානුශාසනාව ඔබත් ශ්‍රවණය කරන්න…!
අභ්‍යන්තර හා බාහිර ආයතන, විඤ්ඤාණය, ස්පර්ශය, විදීම් කෙරෙහි ඇති මුලාව නිසා හටගන්නා රාග, ද්වේශ, මෝහ, ඉරිසියා ආදී අකුසල් වලට යට නොවී, සත්‍යය ඇසීමෙන්, සත්‍යය දැකීමෙන් සිත පිරිසිදු කරගෙන, මෙලොව පරලොව දෙකෙහිම සුවපහසු ජීවිතයක් ගත කිරීමට මඟ පෙන්වන මේ ධර්මානුශාසනාව ඔබත් ශ්‍රවණය කරන්න…!
“මහණෙනි, ඇස අනිත්‍යයි. විපරිණාමයට පත්වෙනවා. වෙනස් දෙයක් බවට පත්වෙනවා. කණ… නාසය… දිව… ශරීරය… සිත…. මහණෙනි, යමෙක් මේ ධර්මය මේ ආකාරයට ශ්‍රද්ධාවෙන් අදහාගැනීමෙන් මේ ධර්මයෙහි බැසගත්තොත් අන්න එයාට කියනවා ‘සද්ධානුසාරී’ කියලා, ඉතා යහපත් මාර්ගයට බැසගත්තා කියලා, සත්පුරුෂ භූමියෙහි බැසගත්තා කියලා, පෘථග්ජන භූමිය ඉක්මවා ගියා කියලා. යම් කර්මයක් කරලා නිරයේ, තිරිසන් ලෝකයේ ප්‍රේත ලෝකයේ උපදිනවා නම් එබඳු කර්මයක් කිරීම අභව්‍යයි. යම්තාක් සෝතාපන්න ඵලයට පත් නොවී තිබෙන තාක් ඔහු කළුරිය කිරීමක් වෙන්නේ නෑ…”
මෙබඳු ශ්‍රේෂඨ ධර්මයන් විස්තර කෙරෙන, පුන් පොහෝ දින චක්ඛු සූත්‍රය ඇසුරින් සිදුකළ මේ ධර්මානුශාසනාව ඔබත් ශ්‍රවණය කරන්න…!
