සීලය පරිපූර්ණ කරගනිමු
සදහම් ලිපිය
ලෝකයට අතිශයින් ම දුර්ලභ ව පහළ වන සම්මා සම්බුදුරජාණන් වහන්සේ නමක් විසින් තමයි ‘ආර්ය වූ සීලය’ නම් වූ උතුම් ධර්මය පණවා වදාළේ. ඒ සීලය මෙලොව යහපත සලසන්ටත්, පරලොව යහපත සලසා දෙන්ටත්, උතුම් නිවන අවබෝධ කරදෙන්ටත් ඒකාන්තයෙන් ම හේතු වෙනවා. සියලු දුකෙන් නිදහස් වීම පිණිස ඒකාන්තයෙන් උපකාර වෙනවා. සීලය ආරක්ෂා වීමකින් තොරව, මෙලොව පරලොව යහපත සලසා ගැනීමවත්, නිවන අවබෝධ කරගැනීමවත් සිද්ධ වෙන්නේ නෑ. තමාගේත් අනුන්ගේත් සියලු යහපත පිණිස උපකාර වන ප‍්‍රධාන ම මූලික ම ධර්මය තමයි සීලය.
සීලය ඉතා ම ගෞරවයෙන් ආරක්ෂා කරගත යුතුයි. සීලය කෙරෙහි ගෞරවය බලවත් නම් සීලය හොඳින් ආරක්ෂා වෙනවා. සීල ගෞරවය හොඳින් ආරක්ෂා වෙන්ට නම්, සංඝ ගෞරවය තිබිය යුතුයි. බුදුරජාණන් වහන්සේගේ ශ‍්‍රාවක සංඝරත්නය ගැන ඉතා හොඳ ගෞරවයක් තිබිය යුතුයි. සංඝ ගෞරවය තිබෙන්ට නම්, ධර්මය කෙරෙහි ගෞරවය තිබිය යුතුයි. ධර්ම ගෞරවය හොඳින් තිබෙන්ට නම් ශාස්තෘ ගෞරවය තිබිය යුතුයි. ඒ නිසා සීලය හොඳින් ආරක්ෂා වීම පිණිස බුදුරජාණන් වහන්සේ ගැන ඉතා හොඳ ගෞරවයක් තිබිය යුතුයි.
බුදුරජාණන් වහන්සේගේ අවබෝධය ගැන ඉතා හොඳින් පහදින කෙනාට ශාස්තෘ ගෞරවය හොඳින් උපදවන්ට පුළුවන්. සීලය ආරක්ෂා කරගැනීම පිණිස මෙලෙස අප‍්‍රමාදී බව ඇති කරගත යුතුයි. බුදුරජාණන් වහන්සේගේ අවබෝධය ගැන පැහැදීම දුර්වල කෙනා තුල ප‍්‍රමාදී බව ඇතිවෙනවා. සීලය ආරක්ෂා කරගැනිම පිණිස ප‍්‍රමාදයට පත්වුණ කෙනාට, මෙලොව යහපත අහිමි වෙනවා. සීලය දුර්වල කරගැනීමෙන් මෙලොව අයහපත් කරගන්න කෙනාට, ඒකාන්තයෙන් පරලොව අයහපත් වෙනවා. මෙලොව පරලොව අයහපත උදා කරගත්ත කෙනා නිවනින් ගොඩාක් ඈත. නිවනට සමීප වෙන්ට බෑ. ඒ නිසා ශාස්තෘ ගෞරවය ඉතා හොඳින් උපදවා ගනිමින් අප‍්‍රමාදී බවට පත්වෙන්න.
මූලික වශයෙන් මෙලොව යහපත ඇති කරගැනීම පිණිස, ඉතා ම උනන්දුවෙන් ප‍්‍රමාද නොවී සීලය සුරක්‍ෂිත කරගන්ට ඕන. අප‍්‍රමාදීව මෙලොව යහපත සලසා ගන්න කෙනා, පරලොව යහපත සලසා ගන්නවා ම යි. පරලොව යහපත අහිමි වෙන්නේ නෑ. මෙලොව යහපත සලසා ගත්ත කෙනා නිවන් මාර්ගය බැහැර කරගන්නේ නෑ. නිවනින් දුරස් වෙන්නේ නෑ. එයා නිවනට සමීප වෙනවා.
ඒ නිසා අපි සමාදන් වෙන සිල් පද ඉතා ගෞරවයෙන්, ඉතා සැදැහැ සිතින්, ආදරයෙන්, ජීවිතේ දෙවෙනි කරගෙන ප‍්‍රමාදයකින් තොරව සුරක්‍ෂිත කරගන්ට උත්සහ කළ යුතුයි. සිත පීඩාවට පත්වෙන්නේ අපිරිසිදු වීමෙන්. සිත අපිරිසිදු වෙන්නේ සීලය අපිරිසිදු වීමෙන්. සිතේ අපිරිසිදු බව දුරුවෙන්ට පටන් ගන්නේ සීලය ආරක්ෂා වීමෙන්. ඒ නිසයි සීලය නිවන් මඟේ අංගයක් වෙන්නේ.
සිල්පද බිඳෙන්ට හේතුවන දේ තමයි ප‍්‍රමාදය. අප‍්‍රමාදී නම් සිල්පද බිඳිලා යන්නේ නෑ. සිල්පද ආරක්ෂා වෙනවා. සිල්පද ආරක්ෂා වෙනවා කියලා කියන්නේ, තමන්ගේ ආරක්‍ෂාව ඉපදිලා. ඒක කායික වශයෙන් ඇතිවන ආරක්‍ෂාවක් නෙවෙයි. භෞතික වශයෙන් ඇතිවන ආරක්‍ෂාවක් නෙවෙයි. අව්වෙන්, වැස්සෙන්, පින්නෙන් වන ආරක්‍ෂාව නෙවෙයි මෙතන දී ආරක්‍ෂාව කියලා කියන්නේ. සිත පීඩාවට පත් නොවෙන විදියට ආරක්‍ෂාවක් ඇති වීම තමයි ධර්මය තුළ අප ලබන ආරක්‍ෂාව.
සිත පීඩාවට පත් වෙනවා නම්, භෞතික වශයෙන් මොනතරම් ආරක්‍ෂාවක් තිබුණත් ඒ ආරක්‍ෂාව අර්ථයක් නැති දෙයක්. භෞතික වශයෙන් අනාරක්‍ෂිතව ඉන්න වෙලාවකදී වුණත්, සිත පීඩාවට පත් නොවෙනවා නම් එයයි ආරක්‍ෂාව. අතිශය පිඩාකාරී ස්වභාවයක් තුළ ඉඳිද්දී වුණත්, කායික වශයෙන් ලොකු පීඩා තියෙද්දී වුණත්, බාහිර පරිසරයෙන් ලොකු පීඩා තියෙද්දී වුණත්, මානසික වශයෙන් සිතෙන් පීඩාවක් ඇති නොවී සැනසීමක් සහිතව වාසය කරන්ට පුළුවන් කමක් තියෙනවා නම්, එය ම තමයි ආරක්‍ෂාව බවට පත්වෙන්නේ. එබදු ආරක්‍ෂාවක් ඇති කරගැනීම සඳහා තමයි මේ සිල් පද මූලික බවට පත් වෙන්නේ. මූලික, ප‍්‍රධාන, නිතර නිතර පවත්වා ගත යුතු, ආරක්‍ෂාව බවට පත්වෙන්නේ සිල් පද ආරක්ෂා වීමයි. සිතේ ආරක්‍ෂාව පිණිස, සිතේ සැනසීම පිණිස, සිතේ පීඩාව උපදින්නේ නැති විදියට රැකගැනීම පිණිස උපකාර වෙන්නේ සීලය.
ඇතැම් මිනිසුන් ඉන්නවා ඉතාම ඉහල භෞතික සැප සම්පත් විඳිනවා. ප‍්‍රණීත භෞතික සැප සම්පත් සහිතයි. රජ මාළිගාවල, සිටු මාළිගාවල ආදී බොහෝ සුව පහසුව, භෞතික සැප සම්පත් තියෙන අය ඉන්නවා. නමුත් ඇතැම් කරදර, උවදුරු ඇතිවෙන කොට ඒ අයට තමන් පරිහරණය කළ භෞතික සැප සම්පත් දාලා යන්ට වෙනවා. අපි කාටත් මොනතරම් භෞතික සැප සම්පත් තිබුණත් ඒවා අතහැරලා යන්ට සිදුවෙනවා ම යි. ඒ වගේ වෙලාවක දී ඒ භෞතික සැප සම්පත් වලින් සැබැ පිළිසරණක් ලබන්ට බෑ. ඒ යතාර්ථය අපට තේරෙන්ට ඕන.
සමහර කාල වලදී රටේ විවිධ විදියේ ප‍්‍රශ්න ඇතිවෙනවා. අර්බුද හටගන්නවා. සතුරු උවදුරු එනවා. සොරු, මංකොල්ලකාරයෝ බිහි වෙනවා. රාත‍්‍රියට වේවා දහවලට වේවා, ගෙවල් වලට පැනලා සොරකම් කරනවා. හිරිහැර කරනවා. ඒ වගේ නොහිතන විදියේ අර්බුද ඇතැම් කාල වලට රටේ ඇතිවෙනවා. ඒවගේ කාලයක් ආවොත්, අපි ළඟ තියෙන භෞතික සම්පත්, ගේදොර ඉඩකඩම්, අපිට ආරක්‍ෂාව පිණිස තියෙනවා ද?
මීට අවුරුදු ගණනකට පෙර රට පුරා ම කැළඹිලි තිබුණා. ඇතැම් මිනිසුන් තමන් හදපු ගේ දොර අතහැරලා දාලා හිස් ලූ ලූ අත දිව්වා. එතකොට ගේ-දොර වේවා, ඉඩම-කඩම වේවා, කිසි දේකින් අපිට සැබෑ ආරක්‍ෂාවක් තිබුණේ නෑ. අපිට ඒ වගේ කරදරයක් පීඩාවක් ඇති නොවුණත්, අන්තිමට අපි ජරාවට පත්වෙලා, ලෙඩ වෙලා, මරණයට පත්වෙනවා. එතකොට එබඳු උවදුරක් අපි ළඟට එනකොට මොන භෞතික සැප සම්පතෙන් වුණත් සහනයක් සැනසීමක් ලබන්ට බෑ.
අපි හිතමු යම් කෙනෙකුට කිසි ම භෞතික සම්පතක් නැති වුණත්, ඉතාම දුප්පත්, භෞතික සම්පත් කිසි දෙයක් නැතත්, සිත පීඩාවට පත්වෙන්නේ නැත්නම්, සිතේ සැනසීමක් තියෙනවා නම්, ගහක් යට හරි ඉඳීම සුවපහසුයි. අව්වේ, වැස්සේ, ඒ වගේ භෞතික පීඩා විඳගෙන හෝ, චිත්ත පීඩාවක් නැතිව ඉන්ට පුළුවන් නම්, සිතේ සැනසීමකින් ඉන්ට පුළුවන් නම්, ඒක තමයි සාර්ථක ජීවිතේ බවට පත්වෙන්නේ. අන්න එබඳු මානසික සුවයක්, මානසික සංසිඳීමක්, සිතේ උපන් සැනසීමක් සහිත ජීවිතයක් උපදවන්ට උපකාර වන ප‍්‍රධාන ම දේ තමයි සීලය.
සීලය හොඳින් ආරක්ෂා කරගත්තොත් කුසගින්නේ හෝ වේවා සැනසීමෙන් ඉන්ට පුළුවන්. සීලය ආරක්ෂා කරගත්තොත්, සොර සතුරු උවදුරු, ස්වභාවික විපත් ආදී අතිශය භයානක උවදුරකට පත්වෙද්දී වුණත් සැනසීමෙන් ඉන්ට පුළුවන්. සීලය හොඳින් ආරක්ෂා කරගත්තොත් ගින්නක් මැද හරි සැනසීමෙන් ඉන්ට පුළුවන්. මරණයට මුහුණ දෙන්ට සිදුවීම තමයි අපට තිබෙන භයානක ම උවදුර. මරණාසන්න වෙනකොට කිසියම් ම කිසි භෞතික දෙයකින් අපිට පලක් නෑ. ප‍්‍රයෝජනයක් නෑ. ඇතැම් විට ඒ භෞතික සම්පත් මරණාසන්න කෙනාට කඩු පහරවල් වගේ වධ දෙන දෙයක් බවට පත්වේවි. මරණාසන්න වෙනකොට කෙනෙකුට සුවයක් උපදිනවා නම් උපදින්නේ තමා සුරක්‍ෂිත කළ සීලයෙන්.
සිල්වත් කෙනාට දානමය පිනත් මහත්ඵල වෙනවා. දුස්සීලව ඉඳිමින් දන් දුන්නත් ඒකේ විපාක ලැබෙන්නෙත් දුගති ලෝකයෙයි. තිරිසන් ලෝකයෙයි. නමුත් සිල්වත්ව දන් දෙන කෙනාට ඒකේ විපාක විඳින්ට ලැබෙන්නේ සුගති ලෝකයකයි. ඒ නිසා සීලය ඉතාම උනන්දුවෙන් ආරක්ෂා කරගන්ට උත්සාහ කරන්න.
සීලය හොඳින් රකින කෙනාට පසුතැවෙන ස්වභාවය නැති වෙනවා. “මම දුෂ්චරිතය අතහැරියා. සුචරිතය පුරුදු කළා” කියලා සතුටු වෙන්ට පුළුවන්කම තියෙනවා. එලෙස පසුතැවෙන්නේ නැති කෙනාට සාර්ථකව භාවනා කරන්ට පුළුවන්. හොඳින් සිත සමාධිමත් වෙනවා.
සමාධිය වඩන කෙනාගේ ජීවිතය ඉතා සුවපහසුයි. සමාධිය වඩන කෙනාට ආර්ය සත්‍ය අවබෝධ කරගන්ට පුළුවන්කම තියෙනවා. සීලය සම්පූර්ණ කරගත්තොත් මාර්ග ඵල උපදවාගන්ට පුළුවන්කම තියෙනවා. සීලය සම්පූර්ණ කෙනා දුගතියෙන් නිදහස් වෙනවා. එහෙම කෙනා යලි ඉපදුණොත් ඉපදෙන්නේ සුගති ලෝකයකයි. එයාට සුගතියක ඉපදිලා සතුටු වෙන්ට පුළුවන්කම තියෙනවා.
ඒ නිසා හොඳට සිහිකල්පනාව තියෙන, කාය ශක්තිය යම් පමණකින් තිබෙන කාලේ, තමාගේ මෙලොව යහපතත්, පරලොව යහපතත්, සියලු කල්හී දුක්පීඩා වලින් තොරව වාසය කිරීමටත් කැමති හිතක් ඇතිව, සමාදන් වුණ සිල් පද ජීවිතයට වඩා ආදරයෙන්, ගෞරවයෙන් සුරක්‍ෂිත කරගන්ට උත්සාහ කරන්න. අපි ආශිර්වාද කරනවා, අවබෝධයකින් යුක්තව උනන්දුවෙන් සිල්පද සුරක්‍ෂිත කරගන්ට සියලු දෙනාට දුර්ලභ වූ භාග්‍ය උදාවේවා!
