ධර්මයෙන් ලබන මහත් වූ සැපයට කැමති වෙන්න

සදහම් ලිපිය
Ven. Nawalapitiye Ariyawansha Thero
පූජ්‍ය නාවලපිටියේ අරියවංශ හිමි
damsayura.lk

බුදුරජාණන් වහන්සේගේ ධර්මය පුරුදු කිරීමෙන් අපට මේ ජිවිතය නොපිරිහෙන දෙයක් බවට පත්කරගන්ට පුළුවන්. මිනිසුන්ගේ පමණක් නෙවෙයි, දෙවියන්ගේ ජීවිතත් පිරිහෙන්නේ නැති විදියට දියුණු කරගන්ට පුළුවන්කම තියෙන්නේ, බුදුරජාණන් වහන්සේගේ ධර්මය පුරුදු කිරීමෙන් පමණයි. වෙනත් බාහිර දෙයක් පුරුදු කිරීමෙන් හෝ භාවිත කිරීමෙන්, යම් ආකාරයක සැප සම්පත් ලබන්ට පුළුවන්. නමුත් ඒ සැප භාග්‍යවතුන් වහන්සේ පෙන්වා දුන් ධර්මයෙන් උපදින සැපයට කිසිසේත් සම කරන්ට හෝ කිට්ටු කරන්ට පුළුවන්කමක් නෑ. ධර්මයෙන් බාහිර දෙයකින් ලබන සැපය, ධර්මය පුරුදු නොකළ කෙනෙකුට මහා විශාල දෙයක් වගෙයි පෙනෙන්නේ. ඒක ස්වභාවයක්. නමුත් ධර්මය පුරුදු කිරීමෙන් උපදින සැප තේරුම් අරගෙන, ධර්මය පුරුදු කළොත් ධර්මයෙන් බාහිරව ලබන සැප කෙන්දක් තරම්වත් නොවටිනා බව අපට තේරෙනවා.

මේ වන විට ඔබ යම් විදිහකින්, යම් තරමකට ඒ භාග්‍යවතුන් වහන්සේ වදාළ ධර්මය අහල තියෙනවා. ඉගෙනගෙන තියෙනවා. එපමණකින් ම ඔබට ලැබුණු සුවපහසුව කොතෙක් ද කියලා සසඳලා බලන්න. ඔබ මෙතෙක් යමකින් ලබන්ට බැරිවුණ, වෙනත් දෙයකින් ලබන්ට බැරිවුණ සුවපහසුවක්, සතුටක්, ප‍්‍රබෝධයක්, ප‍්‍රමුදිත බවක්, ජීවිතය ගැන වැටහීමක් ඇති කරගන්ට ඔබට පුළුවන්කම ලැබෙන්ට ඇති. මේ දක්වා යම් මට්ටමකින් හෝ ඉගෙන ගත් ධර්ම කාරණා පුරුදු කරගෙන ලැබූ සුවපහසුව, සතුට, ප‍්‍රබෝධය, අවබෝධය හොඳින් සසඳලා බැලුවොත් ඔබට තේරේවි, මේ ධර්මය පරිපූර්ණ වශයෙන් අවබෝධ කරගත්තොත්, පුරුදු කරගත්තොත්, එයින් ලබන්ට පුළුවන් අසාමාන්‍ය, අප‍්‍රමාණ සුවපහසුව, සතුට ගැන ඔබට යම් පමණකින් හිතාගන්ට පුළුවන්කමක් තියෙයි.

එනිසා හොදින් තේරුම්ගන්න, මේ ධර්මයෙන් ලැබෙන යම් සැපක් තියෙනවා නම්, සුවයක් තියෙනවා නම්, ඒ සුවය, සැපත ධර්මයෙන් බැහැර කිසිදේකින් හොයන්ට බෑ. ඒ සැප සමීපයටවත් එන්ට පුළුවන්කමක් නෑ. එතරම් මහත් වූ සැප සතුටක් මේ ධර්මයෙන් ලබන්ට පුළුවන්. භාග්‍යවතුන් වහයන්සේ වදාළ ධර්මය පුරුදු කිරීමෙන් මේ ජීවිතයටත්, මතු ජීවිතයටත්, ඒ වගේ ම නිවන අවබෝධ කරන තාක් සැප ලබන්ට පුළුවන්. සියලු දුක් දුරු කරගෙන ලබන ඒ අමා මහ නිවන් සැප ලබන්ටත් මේ ධර්මය පුරුදු කිරීමෙන් පුළුවන්කම තියෙනවා.

ධර්මයෙන් බැහැර පුරුදු කරන වෙනත් ඕනෑම දේකින් පරිපූර්ණ සැපක් ලබන්ට බෑ. ඒ සැප ඉතාම සුළු, නොවටිනා දෙයක්. නොවටින්ට හේතුව තමයි, ඒ සැප දුකින් අවසන් වෙනවා. ධර්මයෙන් බැහැර, කරන කියන දේ තුලින් අපි සැප සම්පත් හොයාගෙන යද්දී, නොයෙකුත් අවුල්, වියවුල්, ප‍්‍රශ්න, අර්බුද, චිත්ත පීඩා වලට බහුල වශයෙන් ගොදුරු වෙන්ට සිද්ධ වෙනවා. ඒවායින් බේරෙන්ට බෑ.

ඉතා සුළු සැපක් ධර්මයෙන් බාහිර දේවල් වලින් ලබන්ට පුළුවන් වෙයි. නමුත් ඒ සැපට වඩා විශාල දුක් ගොඩක්, කලක් පවතින දුක් ගොඩක් උරුම වෙනවා. ධර්මයෙන් බැහැර වෙලා බොහෝ දෙනා මේ ජීවිතයේ පුංචි සැපක් ලබනවා. නමුත් මේ ජීවිතයෙන් පස්සේ ඒවායේ විපාක විදියට එන දුක්, කල්ප ගණනාවක් විඳින්ට සිද්ධවෙන්ට පුළුවන්. ඒකයි ධර්මයෙන් බැහැර දේවල් මගින් සැප උපයන්ට උත්සාහ කිරීමේදී වෙන භයානක විපත.

නමුත් බුදුරජාණන් වහන්සේ වදාළ ධර්මය පුරුදු කළොත්, මේ ජීවිතය පුරා ම පිරිහෙන්නේ නැති සැපක් උපදවා ගෙන සැපසේ වාසය කරන්ට පුළුවන්. ඒ වගේ ම ඊලඟ ජීවිතයේදී, මේ මිනිස් ජීවිතයට වඩා අතිශය බලවත් වූ සැප විපාක සහිත සුගති ලෝක වල වාසය කිරීමේ වාසනාවක් ඉපදෙනවා. යම් කෙනෙක් තවදුරටත් උත්සාහ කළොත්, බලවත් සේ උත්සාහ කළොත්, සියලු දුක් දුරු කරගෙන නිවන අවබෝධ කරගන්ට පුළුවන්කම තිබෙනවා. එයයි භාග්‍යවතුන් වහන්සේ වදාළ ධර්මයෙන් ලබන්ට තියෙන ප‍්‍රතිලාභය. හැම දෙනාට ම සෙත් පතනවා, භාග්‍යවතුන් වහන්සේගේ ධර්මය පුරුදු කරන උතුම් මිනිසුන් බවට පත්වෙලා, ධර්මයෙන් ලබන ඉහල ම ප‍්‍රතිලාභය ලබන්ට භාග්‍ය උදාවේවා! කියලා.

– පූජ්‍ය නාවලපිටියේ අරියවංශ ස්වාමීන් වහන්සේගේ සදහම් අනුශාසනාවක් ඇසුරිනි.

සියලු දානයන් අතර ධර්ම දානය උතුම් වන්නේය!

Share on facebook
Facebook මඟින් share කරන්න
Share on twitter
Twitter වෙතින් බෙදාහරින්න
Share on email
Email එකක් විදියට යවන්න
Share on whatsapp
WhatsApp මඟින් මිතුරන්ට යවන්න